Залатыя правілы народнай культуры
Кніга «Залатыя правілы народнай культуры», аўтарамі якой з’яўляюцца вядомыя беларускія этнографы-даследчыкі Янка (Іван Іванавіч) Крук і Аксана Веніямінаўна Катовіч, стала ўжо бестселерам.
Яе першы выхад у свет адбыўся ў 2007 годзе. З таго часу кніга рэгулярна перавыдавалася вялікімі тыражамі. Зараз, у 2024-м, ажыццёўлена ўжо 15-е выданне, і яно, як і папярэднія, не залежваецца на паліцах кнігарняў. Гэта не дзіўна, бо інфармацыя, прадстаўленая на старонках кнігі, унікальная. Чытач знойдзе апісанне абрадавага напаўнення кожнага з дней традыцыйнага календара ўсходніх славян з тлумачэннем сэнсу рытуалаў і сімволікі, даведаецца (і магчыма, возьме сабе на ўзбраенне), правілы, якіх нашы продкі прытрымліваліся, каб працягнуць і ўмацаваць род, забяспечыць яго дабрабыт. Што можна, а што нельга рабіць (і чаму) пры нараджэнні дзіцяці і на першым годзе яго жыцця, якія звычаі, забароны і прыметы важныя пры правядзенні вясельных і пахавальна-памінальных абрадаў, як правільна выбраць месца для будаўніцтва дома, арганізаваць абарону і захаванне духоўнай і энергетычнай прасторы ў ім, – пра ўсё гэта і многія іншыя векавыя тайны «будаўніцтва Мікракосмасу» нашымі продкамі расказваецца даступнай мовай з суправаджэннем цытат з народной мудрасці.
Кніга разлічана на выкладчыкаў гуманітарных дысцыплін, работнікаў культуры, будзе карыснай усім, хто цікавіцца культурнай спадчынай усходнеславянскіх народаў.
Золотые правила народной культуры / Оксана Котович, Янка Крук. — 15-е изд. — Минск : Адукацыя і выхаванне, 2024. — 590 с. — 2000 экз. — ISBN 978-985-599-740-6.
